Ya tengo telefonucu

Hasta agora, yo yera ún de los pocos que quedaben n'España ensin telefonucu. Porque pol mi trabayu nun me movía muncho y yera fácil d'atopar; porque si taba fora del mi sitiu, casi de xuro que nun pudiera atender al teléfonu anque lu tuviera; porque nun me paez que haiga que tar localizable tol día, o dexar que el que te llama pol teléfonu interrumpa a la persona que se tomó la molestia de venir a falar contigo en presona; porque cuandu ún tien que falar con daquién lo más fácil ye que tea fora cobertura polo que seya; porque pa quedar con daquién creo en quedar a una hora nun sitiu, y facer por cumplilo.

Pero bueno, paecióme que diba siendo hora de rendime y tener teléfonu. Y ayeri merqué ún.

Una maquinona. Como tol mundu farda de móvil, yo tamién. El Nokia 1208. Tien pantalla con colores, y axenda, y calendariu, y milenta coses más... Y nun tien cámara, nin USB, nin Internet, nin ná de ná. ¿Nun te impresiona, ho? Y porque nun teníen ún más baratu, que si non...

Diba compralu por 49 €, pero cuandu el chaval foi a cobrámelu la máquina díxo-y que 39 €. Asina que debieron de ponelu d'oferta sobre la oferta, o algo.

Igual canso d'él, igual lu uso muncho y me doi cuenta de que merez la pena gastar perres nun teléfonu meyor. Pero de momentu... abúltame que ye de sobra.

Non, non penséis que voi tar siempres llocalizable. Pero bueno, agora ya tengo telefonucu y ya soi un paisano.